班士利平盤有內「咸」 英甲星期一晚有比賽，其中班士利會主場對奧咸。班士利剛戰僅負普雷斯頓，但之前主場先後迫和唐卡士打同輕取奧連特，陣容上球隊更有前車路士門將端布爾坐完波監復出，因排名較低而開出平手盤實在好着數，有力喺2014年完結前贏多場。（周一1，香港時間周二3:45am開賽） 奧咸聯賽排名較高，但成個12月佢哋聯賽及英足盃加埋4場比賽輸晒，當中失咗14球只入1球，球員信心及狀態都有疑問；再講奧咸作客班士利往績亦麻麻，對上一次就輸到0:4，今晚佢哋仲有李安基利同後衛洛克活特唔打得，輸多場唔奇。