熱刺入球大「曼」勿錯過

熱刺入球大「曼」勿錯過

英超繼續開快車，熱刺喺白鹿徑球場迎戰曼聯，彼此都有可取之處，勝負的確難料，不過兩軍射手近期嘅腳風超順，而且過往交鋒常演入球騷，預期今晚亦唔會例外，1.65倍入球大熱得有道理。（周日2，now621台周日8:00pm直播）

熱刺已經連贏4場，當中有3次開2:1，所擊敗嘅對手包括史雲斯、般尼同埋李斯特城，另外喺聯賽盃大勝紐卡素晉級，場場都開入球大，而且入得又失得，娛樂性的確好豐富，最重要係新晉射手哈利卡尼已經連續4場有士哥，好難勒得住佢，而蘇爾達杜又重拾射門鞋，故即使另一位前鋒艾迪巴約麻煩多多，都無損熱刺攻力。

熱刺防線近戰失波多

前面入到波雖然可喜，不過熱刺後防唔穩陣亦係事實，門將洛里斯近5戰只有1次可保持不失，基爾獲加復出咗都解決唔到防守上嘅問題，一對中堅法斯奧同埋維頓漢都唔足以信賴，領隊普捷天奴喺1月轉會窗重開後，真係要考慮增兵。

法卡奧復出愈戰愈勇

曼聯近8場比賽不敗，當中取得7勝1和，難怪全隊上下已經提升目標，由當初爭前四變成要爭冠軍。事實上，紅魔鬼傷兵雖然多，勞基梳爾同埋戴利白蘭特等人仲未痊癒，但係球隊板凳深度尚算充足，領隊雲高爾未致於冇兵可用，加上法卡奧復出後表現上晒力，拆禮物日大勝紐卡素一戰，呢位哥倫比亞鋒霸更加為隊長朗尼送上助攻，唔好忘記仲有尹佩斯呢隻頂班馬，曼聯嘅進攻火力當然有保證啦，今場贏唔贏到就未知，但最起碼唔使擔心佢哋入唔到波。
睇番往績，熱刺同曼聯近年交手常開大比數戰果，上屆熱刺作客奧脫福贏2:1，曼聯作客白鹿徑就打和2:2，次次都精彩，今晚再吼兩軍合演入球大。