勝利讓主「機」不可失

勝利讓主「機」不可失
     
澳職今日又有雙料娛樂，其中尾場墨爾本勝利主場對紐卡素噴射機，理論上應係一面倒比賽，加埋勝利啱啱作客輸俾墨爾本城，球員一肚火下肯定搵噴射機嚟發洩，捧「讓主」「機」不可失。（周六1，有線64及203台周六2:00pm直播）

無疑，墨爾本勝利係兩場不勝，但主場同悉尼各得一分，以及作客僅敗俾墨爾本城，賽績其實又唔算好肉酸；再睇佢哋之前3連勝，連贏咗獅吼、阿德萊德聯以及水手，證明對次一級對手表現會穩陣得多，加埋今戰有主場之利，自然值得睇高一線。
陣容方面，勝利今周有米利根要坐波監，而史葛加路維同迪比亞就因傷缺陣，值要留意艾奇湯臣、貝利沙以及賓卡法拿近況都甚Fit，前者更係對悉尼比賽個人大演帽子戲法，有理由相信呢個攻擊鐵三角，將會令客軍防線非常之頭痛。
噴射機上周爆大冷主場險勝阿德萊德聯，終於打開今季勝利之門，但睇番佢哋之前頭十輪比賽都未能打破悶局，實在唔敢相信球隊已經反底；再講，客場其實一直係噴射機弱項，近10戰得2和8負，僅入6球但失咗21球，數據弱得嚇人。

噴射機作客墨爾本冇優勢

再講，噴射機今戰缺陣球員比起主隊更多，查利安斯要停賽，泰萊列根、施利斯基同祖舒巴里斯全部因傷缺陣，主力如祖爾格菲斯今季入球數字亦偏低，根本完全無優點可言；另外翻查往績，噴射機歷來12次作客墨爾本勝利，賽績係3勝2和7負，格食格味道甚濃，捧「讓主」合理。