紅軍“般”三分冇走雞

車路士讓主老少咸宜

英超拆禮物日早場由車路士對韋斯咸，呢場同時係倫敦打吡戰，雖然槌仔幫近況唔錯，不過藍戰士實力非凡，為咗要令主場球迷有一個快樂聖誕，「讓主」真係唔慳得，買車路士普世歡騰！（周五3，now621台周五8:45pm直播）

摩連奴果然冇講大話，俾紐卡素打破不敗身之後，車路士一樣愈戰愈勇，皆因球隊唔係追求完美紀錄，最重要都係捧盃，所以最近4場比賽全勝並非僥倖，當中包括喺歐聯輕取士砵亭、聯賽盃淘汰打比郡，同埋喺英超擊敗侯城同史篤城，仲要連續兩場比賽開出「-1」，換言之波盤齊贏。

夏薩特證受傷屬流料

外電有傳夏薩特因為對史篤城一戰受傷，趕唔切喺拆禮物日落場，不過呢位比利時球星就親口辟謠，強調佢準備好披甲對韋斯咸，如果屬實的話，車路士目前一個傷兵都冇，法比加斯、迪亞高哥斯達、泰利、奧斯卡杜斯山度士等人全部踢得，連帶喺聯賽盃撞親頭嘅新人葛特蘇馬都宣布傷癒，陣容強到咁，真係等攞3分。

韋斯咸近績有疑點

韋斯咸今屆係最驚喜嘅黑馬之一，佢哋近5場英超獲4勝1和不敗佳績，目前排喺聯賽榜第4位的確唔係靠運，不過要留意槌仔幫呢幾場嘅對手唔算強，車仔檔次高咁多，絕對係真正考驗，而且韋斯咸近年作客史丹福橋冇啖好食，單計近6次都2和4負不勝，加上中堅湯堅斯、隊長路蘭同埋中場麥克盧保都有傷，後兩人一直都係球隊嘅骨幹，難怪領隊艾拿戴斯都話好頭痛。
安祖卡路爾呢期Fit爆，不過要衝擊車路士嘅防線，仲要問過泰利同加利卡希爾兩條大杉，所以足智彩開讓球主客和，放心捧車路士開「讓主」，波膽吼2:0或者3:1都係大熱，可以玩番兩手。