畢爾包下盤機「會」高唱

畢爾包下盤機「會」高唱
 
西甲今晚焦點比賽係畢爾包主場對馬德里體育會。畢爾包主場一向有威力，撞正馬體會近績有疑點，是役更有兩主力要坐波監影響戰鬥力，讓球盤畢爾包受讓平半，開下盤機「會」高。（周日33，now632台周一4:00am直播）

相信好多球迷都知，畢爾包係一支主場威力強大球隊，雖然今季賽績稍見下滑，但近4戰仍有3勝佳績，包括勇挫巴迪同愛斯賓奴，連埋之前喺唔擅長嘅作客環境之下，都連贏到薩克達以及基達菲，今戰因主場而受讓平半肯定有着數。
人腳方面，畢爾包接近以「夫添」出擊，缺陣球員如伊度拉斯比同拿樸迪，都唔係乜嘢唔可以替代主力，相反主力殺手阿度里斯、中場核心迪馬高斯、比納特以及米基聖荷西、艾斯達等三線主力都可以候命，主場仲受讓平、半信得過。
馬德里體育會今季實力肯定冇上季咁強，所以賽績亦冇上季咁穩定，球隊近3周接連賽和祖雲達斯、賀斯比圖勒以及主場輸俾維拉利爾結束長期不敗紀錄，講數據甚至唔及得畢爾包咁穩陣。

馬體會剛破主場不敗身

再講，馬體會今晚肯定有兩主力唔出得，事關佐治高基同文迪蘇傑都要坐波監，呢兩位球員絕對係球隊中前場核心，一次過唔打得絕對會令教頭施蒙尼非常頭痕。無疑，馬體會近年作客唔多驚畢爾包，單近兩次作客都贏晒，但馬體會上輪先破完主場不敗紀錄，今季整體實力冇咁強之餘，仲要有兩中前場主力缺陣，咁情況下邊似讓得起平、半。