阿仙奴平盤萬「物」錯過

阿仙奴平盤萬「物」錯過

利物浦風雨飄搖，除咗戰續低迷之外，羅渣士嘅怪陣又令人摸不着頭腦，以致呢位領隊嘅被炒傳聞甚囂塵上，今晚英超喺主場對阿仙奴肯定難捱，足智彩開平手盤，捧兵工廠坐走望贏。（周日22，now621台周一12:00am直播）

周中聯賽盃雖然擊敗般尼茅夫晉級，但係對手只係英冠仔，利物浦贏波都唔代表佢哋反彈，因為之前喺歐聯出局，加上作客百年宿敵曼聯慘吞三蛋，全隊士氣都跌到落谷底，而且格連莊臣、法拿根同埋史杜列治倦勤，更有傳巴洛迪利都傷埋，未必趕及披甲，人腳絕對冇驚喜。

羅渣士排陣方寸大亂

領隊羅渣士最近經常排怪陣，特別係佢嘅無鋒陣式，已經招嚟好多批評聲音，喺曼聯一戰屢失良機嘅史達寧，又遲遲唔肯續約，加上取代米洛列特把關嘅巴特鍾斯唔見穩陣，連帶謝拉特等領袖級人物都被評懶於走動，不利消息滿天飛，今晚即使有主場之利，亦唔見得有勝算。

阿仙奴已適應傷兵潮

阿仙奴上場英超以4:1輕取紐卡素，近6場比賽取得5場勝仗，表現已經逐步提升，雖然奧斯賓拿、哥斯尼、蒙利爾、艾朗藍斯、奧斯爾、阿迪達、韋舒亞、禾確特同埋路斯基都肯定因傷缺陣，不過球隊今季已習慣喺呢種模式下作賽，上述傷兵當中，好多人亦都抖咗一段時間，反而施捷斯尼呢位正選門將復出，就令後防回復穩健。
今晚平手盤都睇好兵工廠嘅原因，係進攻鐵三角阿歷斯山齊士、韋碧克同基奧特腳風超順，而辛迪卡索拉更重演最初加盟球隊嘅精彩演出，所以作客都唔驚利物浦，最重要係阿仙奴近6次作客晏菲路取得3勝2和1負，不敗率有幾高已經有目共睹，捧阿仙奴坐走望贏格，何樂而不為？