愛華頓受讓等「修」錢    修咸頓近況頹到爆，快車賽程已經連輸5場，加上繼續受到傷兵困擾，睇嚟仲未可以反底，是役即使喺聖瑪利主場出擊，睇嚟都好難搞得掂愛華頓，足智彩要修咸頓讓平手、半球搵笨，捧拖肥糖下盤。（周六19，now623台周六11:00pm直播） 連負曼城、阿仙奴同埋曼聯都情有可原，不過輸俾般尼，又喺聯賽盃俾錫菲聯踢出局，就反映出修咸頓真係好頹，鬼叫球隊傷兵太多咩，包括舒尼達連、積克確克同埋科連加度斯，而中場硬雲耶馬亦會喺今仗坐波監，陣容殘到不堪。 愛華頓都有奧士文同埋希拔倦勤，不過另一位中場占士麥卡菲就已經復操，最重要係球隊上場英超以3:1擊敗昆士柏流浪，終止咗近4場不勝嘅走勢，當中巴克里、米拿拉斯同埋賴史密夫都分別取得士哥，今晚受讓平手、半球好著數，買下盤等「修」錢。