紅魔鬼讓和做「東」

紅魔鬼讓和做「東」 

曼聯6連勝氣勢如虹，今晚作客阿士東維拉當然無畏無懼，事關紅魔鬼唔止近況好，佢哋過往幾季同維拉交手亦有贏冇輸，預計今仗可小勝而回，3.25倍「讓和」咁好分，梗係有數「維」。（周六16，now621台周六11:00pm直播）

阿士東維拉之前有啲起色，連勝水晶宮同埋李斯特城，正式脫離榜尾位置，但係上周以0:1不敵西布朗，又打窒咗度氣，基蘭李察臣仲要食紅牌出場，今晚對曼聯唔使預佢倒戈，冇咗呢位可踢翼同埋閘嘅左腳球員，對阿士東維拉一定有影響。困擾領隊林拔嘅唔止基蘭李察臣，仲有侯頓都要停賽，而辛德路斯、尼敦巴卡、艾殊利韋斯活特、祖高爾同埋高薩克等人全部都因傷缺陣，加埋湯卡華利本身係曼聯借將，所以亦無緣披甲，是役即使喺主場出擊，都冇條件喺曼聯身上搶分，睇嚟兩連敗在所難免。

兩軍近6次交手曼聯未輸過

曼聯已經一口氣取得6連勝，先後擊敗水晶宮、阿仙奴、侯城、史篤城、修咸頓同埋利物浦，排名即時跳升到第三位，轉眼間竟然加入埋爭標行列，真係唔到你唔服，而領隊雲高爾同前鋒尹佩斯就啱啱奪得荷蘭國內體育界嘅獎項，真係喜事重重，陣營內嘅士氣同埋信心都正值高點。
其實紅魔鬼戰績回升亦因為傷兵愈嚟愈少，目前只有基斯史摩寧、勞基梳爾、戴利白蘭特同埋迪馬利亞倦勤，而菲爾鍾斯就已經喺對利物浦一戰復出，加上朗尼呢排狀況良好，球隊嘅攻守實力都有保證，食住個勢取得7連勝係意料中事。
睇埋往績，曼聯近6次不論主場作客都冇輸過俾阿士東維拉，如果齋計作客維拉公園球場，曼聯更加連續3屆取勝，格食格味道好濃，不過今屆雲高爾入主之後，紅魔鬼係踢得比較穩陣，故預期今戰未必會大勝，3.25倍「讓和」正路。