愛華頓讓主破「浪」

愛華頓讓主破「浪」

英超星期一晚上演獨腳戲由愛華頓主場對住昆士柏流浪。講真「拖肥糖」今季演出冇上季咁搶眼，只係昆流級數本身低一班，作客更係超級死穴，呢場喺葛迪遜公園進行比賽，「讓主」依然有計。（周一4，now621台周二4:00am直播）

唔經唔覺，愛華頓原來已經4場正式比賽不勝，但作客輸俾曼城同埋熱刺其實唔算太肉酸，過去周中歐霸亦係已穩奪出線權之下，先收起大量主力主場輸俾卡斯洛達，拖肥糖呢輪賽績轉差其實都尚算係情有可原。
再講，愛華頓之前主場贏過里爾同韋斯咸等有級數對手，表現算係唔差；陣容上雖然中場巴利要停賽，但波斯尼亞小將比錫可取代其位置，中場占士麥卡菲、吉遜、賴史密夫同埋史東斯等長期傷將亦有可能喺今晚就可以候命，再配合米拿拉斯、盧卡古、伊度奧同巴尼斯等高質球員，主隊仍值得睇高一線。
昆士柏流浪係今季降班熱門之一，雖則球隊近績已有改善，近期贏過李斯特城同般尼，並迫和過曼城，但以上要注意全部係主場賽事，客場問題似乎未得到解決，因昆流客場已遭逢9連敗，當中加埋更失咗19球之多。

柯士甸停賽影響重大

禍不單行係，昆流今周仲有首席殺手查理柯士甸要坐波監，呢位英格蘭中鋒今季入咗8球，而昆流聯賽到依家15場只入咗16球，換句話講查理柯士甸包辦球隊一半入波，對攻力影響肯定重大，再加上辛度雲尼亞里、艾真度科連同泰拉拔因傷未能候命，昆流要破數據就更難。