馬體會上盤「爾」定成局

馬體會上盤「爾」定成局
 
西甲皇馬連勝紀錄不斷，但唔好忽視同市馬體會都已經伺機而動，佢哋聯賽3連勝下，現時只比皇馬少4分排第3，如果前列兩隊稍有差池，馬體會又可重演上季勝利之道，呢一周佢哋主場對維拉利爾，「黃色潛艇」周中歐霸用咗唔少力，今季對強隊亦冇對抗性，睇嚟難逃一敗，主隊絕對讓得起半一。 （周日24，now632台周一2:00am直播）

維拉利爾一如上季穩定，但季初未有太多增兵下，今季要兼顧歐霸多少都有影響聯賽成績，現時佢哋排第6其實已被第4嘅西維爾稍彈甩，而且由於要確定歐霸出線權，周中佢哋對利馬素都用咗幾多主力，當中前鋒韋圖等常規正選都有上陣，加上隊中原有傷兵如卡尼、杜斯山度士、梅沙基奧、靴蘭佩雷斯以及祖傑等，呢場作客馬體會就更難打。
馬體會係季初稍稍唔似樣，但由於今季買入文迪蘇傑及基沙文，火力整體上根本比起上季更強，早就預計佢哋去到季中會愈打愈順，果然球隊近12場賽事贏足10場之多，成績一啲都唔比皇馬同巴塞差，而且上述兩大進攻主力近期更不間斷取得入球，球隊近戰一係唔贏，一贏就贏兩三球以上，同季初經常僅勝對手已大有分別，配合埋後衛祖奧米蘭達已復操可望上陣，主隊防線只會更為穩陣。

皇馬祖記造訪全敗

事實上，馬體會今季主場成績真係非常誇張，季內只有一場被切爾達迫和，其後祖雲達斯、皇馬嚟到全數要輸，而且近6場主場賽事，馬體會全勝之餘，更每一場都以兩球以上差距贏波，可見今場波馬體會主場少讓半一，食足全格機會相當高，當然博啲嘅，買「讓主」都一樣得。