曼聯上盤「物」超所值

曼聯上盤「物」超所值

英超今晚上演「雙紅會」，由曼聯喺奧脫福佈陣迎擊利物浦，考慮到紅魔鬼愈戰愈勇，傷兵情況又不斷改善，是役面對落水狗利物浦有望延續連勝走勢，讓半球、一球上盤絕對係「物」超所值。（周日9，now621台周日9:30pm直播）

大戰當前，曼聯領隊雲高爾走出嚟報佳音，指出球隊目前只係得番4個傷兵，包括迪馬利亞、戴利白蘭特、勞基梳爾同埋基斯史摩寧，當中戴利白蘭特已復操作輕量訓練，而基斯史摩寧嘅傷勢亦唔嚴重，預計兩星期內可以復出，情況比起季初大大改善，兵源調動方面亦鬆動咗好多。

紅魔上力近五戰全勝

事實上，曼聯已經逐漸上力同埋適應咗雲高爾嘅戰術，近期更打出個5連勝，先後砌低水晶宮、阿仙奴、侯城、史篤城同埋修咸頓，一支箭就標咗上前列位置，是役由朗尼夥拍尹佩斯攻堅，數糊能力唔使懷疑，須知道尹佩斯過往12場英超對利物浦共入6球，平均打兩次就入1球，剋星味濃。
喺歐聯出局丟盡英超假嘅利物浦，大戰前由隊長謝拉特領軍，去咗醫院探望小朋友派聖誕禮物，雖然善心爆棚，但就見到呢班球員根本唔太在意成績，欠缺咗一種要撥亂反正嘅決心，相反對手曼聯就不斷為比賽演練，彼此心態差好遠。

紅魔主場鬥紅軍往績佳

巴洛迪利據報可復出，但係呢位射手麻煩多多，加盟後又碌碌無能，未必幫得到紅軍，而且拉爾拉拿上場歐聯要打支痛針先可以做後備，今晚可以幫到球隊幾多都係未知數，最重要係利記後防實力同埋領隊羅渣士嘅領軍能力都被譏為業餘水準，出征奧脫福真係未許樂觀。
以曼聯近6次主場5次擊敗利物浦嘅往績數據，今晚讓半球、一球唔算過份，上盤「物」超所值買得過。