曼城讓客「李」所當然

曼城讓客「李」所當然 
 
啱啱喺歐聯贏咗羅馬殺入16強嘅曼城，依家陣內士氣如虹，雖然射手阿古路受傷，但周中坐波監嘅耶耶托尼等球員可以復出，加埋李斯特城亦缺少咗門神卡斯柏舒米高，讓一粒「讓客」好穩陣。（周六17，now622台周六11:00pm直播）

過去周中作客2:0贏咗曼城，唔經唔覺下曼城原來已經6連勝，當中近4戰更有三次可以保持清白之身，僅失過一粒俾新特蘭，可以證明呢支衛冕聯賽冠軍已全面復勇，而歐聯殺入16強，亦肯定對球員士氣好有幫助。
陣容方面，曼城無疑有當家殺手阿古路受傷，後防主力兼隊長甘柏尼亦未必會落場，只係曼城陣中粒粒皆星，法國中場拿斯尼就喺周中場出手協助球會贏波，加埋嗰場停賽嘅耶耶托尼可連同已復操多時嘅大衛施華一齊候命，曼城陣容可以話依然完整。
主隊自從9月尾反勝曼聯5:3後，踢10場聯賽得2和8負，近況明顯直插谷底兼已成為降班大熱；事實上李斯特城陣容參差，得老將甘比亞素同季初加盟新援荷西烏路亞算夠班，球隊仲要有門神卡斯柏舒米高重傷提早收咧，咁大打擊睇怕難望偷雞。