車仔讓主胸有「城」竹

車仔讓主胸有「城」竹 
 
車路士嘅不敗紀錄上周被終止，但呢個只係另一個長勝嘅開始，是役藍戰士喺史丹福橋球場迎戰侯城，3分到手基本上冇懸念，為咗重振聲威，即使足智彩開到「-2」，「讓主」都胸有「城」竹。（周六15，now621台周六11:00pm直播）

上周意外不敵紐卡素，令車路士嘅跨季不敗紀錄終止喺第23場，但係呢場敗仗冇打擊到球員信心同士氣，車仔周中歐聯以3:1輕取士砵亭，領隊摩連奴喜見舒賀爾尼同埋約翰米基爾等後備球員都有良好表現，所以今戰對侯城雖然有法比加斯累積夠5張黃牌自動停賽，球隊仍然有足夠兵源調動，加上夏薩特、奧斯卡杜斯山度士、伊雲洛域、泰利同埋泰拔高圖爾斯周中休息，養精蓄銳喺今晚復出，「讓主」更信得過。
侯城已經累積咗8場英超不勝，早前更經歷咗一段4連敗，先後不敵修咸頓、般尼、熱刺同埋曼聯，加上辛迪加斯同埋迪亞美兩位傷兵仲未趕及復出，領隊布魯士想變陣亦唔容易。上季侯城兩戰車路士主客皆北，兩隊實力分野太大，是役延續呢項往績一啲都唔意外，預料藍戰士今晚又可以大勝一場。