阿仙奴讓主橫「素」

阿仙奴讓主橫「素」 
 
今晚英超由阿仙奴主場對紐卡素做壓軸戰，兩隊近況各有千秋，不過兵工廠始終喺酋長球場出擊，球迷聲勢浩大，加上對賽往績佔壓倒性優勢，讓一球依然值得睇好，2倍「讓主」搭好炮台打鵲！（周六55，now621台周日1:30am直播）

阿仙奴上周英超雖然以2:3不敵史篤城，不過佢哋周中歐聯半力出擊，依然以4:1輕取加拉塔沙雷，艾朗藍斯更加射入世界波，球員嘅信心同士氣已經即時反彈，同場仲見到耶耶辛洛高復出，普多斯基久疏戰陣亦有貨交，雖然佢兩個並非正選，但係有多啲兵源調動，始終係好事。奧斯賓拿、蒙利爾、奧斯爾、韋舒亞、阿迪達同埋禾確特繼續養傷，哥林張伯斯就要停賽，艾朗藍斯噚日亦證實拉傷缺陣4星期，好在攻擊鐵三角仲見到基奧特、阿歷斯山齊士同埋韋碧克健健康康，配合辛迪卡索拉做策劃，是役仍值得睇好。

紐卡素傷停問題嚴重

紐卡素上周以2:1打破車路士不敗金身，但係呢仗只係佢哋近3場首次贏波，最重要係球隊今仗有穆沙施素高同埋史提芬泰萊停賽，前者缺陣影響甚大，而告魯爾、賴恩泰萊、大衛辛頓、洛艾利洛、奧巴坦、路蘭度艾朗斯同埋約拿斯古迪利斯亦會倦勤，門將一職更要用到第三後備嘅安恩域，睇怕都好難頂得住兵工廠嘅強攻。

兵工廠鬥喜鵲五連勝

其實今戰決定勝負嘅重要因素，絕對係對賽往績，咪睇阿仙奴呢幾季碌碌無能，查實佢哋最鍾意打鵲，上季主場贏3:0真係濕濕碎，前季怒炒紐卡素7:3先至經典，當日阿歷士張伯倫、普多斯基同埋基奧特等人全部有士哥，即使唔計主場作客，阿仙奴已經喺英超連續5次擊敗紐卡素，格食格味道甚濃，捧2倍「讓主」冇點你。