阿聯上盤「布」局精奇

阿聯上盤「布」局精奇
 
澳職今日上演雙料娛樂，其中頭場阿德萊德聯整體表現較布里斯班獅吼優勝，有埋主場之助相信可順利全取3分，讓球盤讓到半一依舊可放心捧場。（周五1，有線64及203台周五4:40pm直播）

阿聯喺上周聯賽對住應屆亞冠盃得主西悉尼流浪者，結果輕鬆贏2:0，近7場澳職賽事得5勝1和1負佳績，僅作客2:3不敵墨爾本勝利，證明演出非常穩定；而最重要一點，係阿聯冇乜傷病問題，卡路斯卡、沙治奧施里奧同迪捷特等主力都可候命，配合主場近10戰7勝3和佳績支持，讓半一合理。
獅吼今季出閘大脫腳，雖然近期表現有好轉，先後作客贏到紐卡素噴射機同西悉尼流浪者，但上周作客不敵墨爾本城同之前不敵墨爾本勝利比賽，亦證明佢哋造訪強隊冇優勢可言；再講球隊今季實在過份依賴軒歷基安達迪搵食，阿聯防守上好易作部署，想偷雞難矣。
尾場珀斯光輝會鬥紐卡素噴射機。一哥光輝上周作客都贏到FC悉尼，近7戰6勝1和，證明失準機會唔高，相反噴射機作客近9戰2和7負，近8場正式比賽亦未贏過，呢場開「讓主」機會極高。（周五2，有線64及203台周五6:45pm直播）