布拉格斯巴達標「青」

布拉格斯巴達標「青」

年青人喺歐霸I組許勝不許和，無奈對手係只求1分嘅布拉格斯巴達，上演攻防戰係預期之內，鑑於布拉格斯巴達今屆歐霸有穩定演出，平手盤有權偷雞贏埋。（周四19，有線64及203台周五4:05am直播）
上周本土聯賽擊敗草蜢之後，年青人已經一口氣取得6連勝，但由於喺歐霸表現飄忽，故此喺小組暫列第3位，今晚主場對布拉格斯巴達一定要贏波先可以出線，阿根廷前鋒干沙路沙拉迪演出好壞，將會係勝負關鍵所在，只可惜佢班隊友質素平平，法國前鋒夏奴拉呢期腳風又唔順，主場出擊都欠勝算，難怪足智彩開出平手盤。
布拉格斯巴達暫以5戰3勝1和1負排小組第2，累積入咗11球而只失4球，攻守表現都好平穩，是役攞1分都夠出線，啱晒捷克球隊嘅穩守突擊作風。喺最新一期嘅捷克國家隊名單當中，布拉格斯巴達有4個球員入選，包括右閘卡達拉碧、中場杜卡爾、基積斯，同埋前鋒大衛拿費迪，整體實力絕對唔簡單，今晚平手盤坐走望贏，有權反客為主玩死年青人，平盤客勝去馬。