巴塞上盤「聖」券在握

巴塞上盤「聖」券在握
 
歐聯F組今晚有場首名出線資格之爭，主隊巴塞隆拿有球王美斯處於大勇之境，加上尼馬以及蘇亞雷斯協助，自然有力喺魯營球場擊潰巴黎聖日耳門，攞到首名出線權兼報首循環輸波之仇，讓球狠讓一球有計。（周三6，有線64及203台周四3:45am直播）

先講吓形勢先，巴黎聖日耳門依家其實排緊榜首有13分，反之巴塞得12分排第2，換句話講巴黎只要和波都首名出線，而巴塞就一定要贏至得。
不過咁，巴塞近排有個勇不可擋嘅美斯，呢位阿根廷球王近4場落場比賽3次上演帽子戲法，近有份6場落場比賽入咗11球之多，近況勇到不得之了；再講美斯依家仲同宿敵C朗鬥緊，佢上輪中三元後，以74球成為歐聯射手王，但由於C朗入波同樣停不了，美斯想再挫C朗自然要加多把勁將紀錄放離。
值得一提，巴塞原來自2007至08球季起，次次都喺分組賽做一哥，數據咁強當然唔可以輕視；至於陣容方面，球隊有拉芬拿艾簡達拿同丹尼爾坐波監，但球隊有如馬田蒙度亞等有實力球員作替補，影響相信唔大。

巴黎作客表現一般

巴黎聖日耳門理論上和波都得，但擺大巴一向唔係佢哋風格兼擅長戰術，教頭白蘭斯相信唔會咁做。無疑，巴黎係歐聯幾大聯賽至今唯一仍保持不敗球隊，主力伊巴謙莫域又啱啱喺過去周末2:1贏南特聯賽，個人包辦兩個入球腳風極順，只係睇佢哋聯賽作客里爾、圖盧茲同阿積士都贏唔到，贏波比賽如對梅斯、羅連安特同尼科西亞竟然都係一球險勝，客場表現似冇主場有咁強氣勢，今造訪魯營大有機會輸今季第一場波。