皇馬讓客橫「素」千軍

皇馬讓客橫「素」千軍 
 
歐聯B組榜首大戰，暫列次席嘅巴素利當然想保持不敗，以實現晉級希望，但由於對手皇家馬德里實力太強，加上安察洛堤再領軍贏多兩場，就可破摩連奴連勝紀錄，所以「讓客」始終抵玩。（周三9，有線62及202台周四3:45am直播）

巴素利近3場瑞士超級聯賽全勝，加埋瑞士盃同上一輪歐聯擊敗盧多格德斯在內，球隊已累積5連捷，不過佢哋同銀河艦隊嘅實力始終差太遠，歐聯B組首循環交手，巴素利已經以1:5敗走班拿貝，是役返回主場都冇咁容易拉近彼此分野，輸波理所當然。

皇馬望創16連勝紀錄

皇家馬德里篤定晉級，但唔代表佢哋會放軟手腳，因為球隊只要再贏巴素利同埋本周西甲對手馬拉加，就會創下16連勝嘅超級紀錄，舊紀錄就係摩連奴嘅15連勝，相信肥安一定叫球員搏命。C朗同時追逐緊佢嘅歐聯入球紀錄，呢位葡萄牙球星近況咁好，又有占士洛迪古斯同埋賓斯馬等高質隊友支援，今晚要取得「士哥」絕對唔難。兩軍喺小組首循環交手時，銀河艦隊以5:1輕鬆報捷，是役嘅劇情變化相信唔會太大，所以足智彩開讓球主客和，皇馬「讓客」食硬巴素利。