曼城讓主「仁」者無敵

曼城讓主「仁」者無敵
 
曼城雖然冇乜霸氣，但由於喺歐聯E組瀕臨出局邊緣，適逢今仗對手拜仁慕尼黑又已經篤定晉級，雙方嘅決心差好遠，預計藍月亮可以喺主場威番鋪，受讓捧1.7倍「讓主」好穩陣。（周二4，有線61及201台周三3:45am直播）

藍月亮上周英超幾經辛苦先至擊敗史雲斯，但最緊要係全取3分之餘，隊長高柏尼又同時擺脫傷患，佢喺缺席咗比利時兩場國際賽之後，明顯已經休息夠，表現龍精虎猛，是役鎮守後防一定可頂住拜仁，而工兵型嘅占士米拿亦可代替停賽嘅耶耶托尼。

拿斯尼可代施華派牌

大衛施華同埋迪斯高因傷續掛免戰牌，不過拿斯尼可以取代前者位置，呢位法國國家隊嘅創造型中場，喺曼城對史雲斯一戰仲獲選為最佳球員，有佢為阿古路作出供應，藍月亮前線唔愁冇攻力，更何況另一位箭頭祖維迪已經破咗入球荒，喺迪斯高唔踢得之下，簡直係及時雨。

拜仁傷兵問題更嚴重

講到傷兵情況，拜仁慕尼黑就嚴重得多喇，雖然舒韋恩史迪加久休復出，不過隊長拿姆、查維馬天尼斯、連拿同埋堤亞高艾簡達拿就一定唔踢得，兩位德國隊重心包括紐亞同埋湯馬士梅拿亦係有傷在身，極其量紮住踢，點會搏到盡呢？因為大前提係拜仁已經喺歐聯E組提前兩輪出線，餘下兩仗就算輸幾多球都唔會影響大局，換轉你係教練哥迪奧拿，都會叫班球員就住啦，所以拜仁嘅18場不敗走勢都係時間結束，如果作客輸俾曼城，呢個結果都好合理吖。
再睇埋往績，其實藍月亮對住拜仁一啲都唔失禮，2011年歐聯分組賽就有主場擊敗對手嘅紀錄，上屆更試過喺安聯球場贏拜仁，彼此嘅實力分野唔算好大，足智彩開讓球主客和，拜仁讓一球好凶險，曼城1.7倍「讓主」熱得有道理。