修咸頓做「東」開客勝

修咸頓做「東」開客勝
 
下輪英超開始修咸頓就要面臨死刑，事關佢哋將會面對「死亡賽程」，好在臨行刑前只係作客近況毫無睇頭嘅阿士東維拉，客勝嘅分頭唔錯仲有1.62倍，可以當係最後晚餐食飽飽先再諗前路！（周一7，now621台周二4:00am直播）

踢埋今輪賽事之後，修咸頓喺月尾就要喺主場硬撼億萬大軍曼城，之後喺12月就要先後面對阿仙奴、曼聯、愛華頓，同埋車路士等強勁對手，始終佢哋嘅兵源相當有限，撇除仲未出得嘅積洛迪古斯全隊用得嘅球員都唔夠20個人，能夠過到幾多關都仲係未知之數，唯一可以肯定嘅係佢哋一定會趁住未進入「死亡賽程」之前一定會諗盡辦法喺維拉身上搶分，事關中場沙迪奧文尼講到明，球隊上下目前已經將目標鎖定為歐聯席位，對住弱旅完全冇失分空間。

維拉九月尾曾連輸六場

好彩相信要喺維拉身上攞分應該冇乜難度，事關主隊維拉由9月尾開始曾經連輸6場，當然你可以話呢幾場敗仗輸俾阿仙奴、車路士、曼城、愛華頓，甚至係熱刺都係情有可原，不過亦唔好睇漏近7戰佢哋只係靠過安祖斯韋文入過1球波咁大把，入波數字低到咁真係點講都講唔通喎，所以無謂再幫佢哋搵輸波藉口嘞！好衰唔衰，今晚維拉有賓迪基停埋賽之餘仲要冇埋高薩克、侯頓等球員，極有可能成為「聖徒」臨踢「死亡賽程」之前嘅最後晚餐任人魚肉。