AC米蘭「際」勝之道

AC米蘭「際」勝之道
  
米蘭打吡今晚打響，國際米蘭雖然有新帥文仙尼上任，但係球隊人腳同埋戰術都係換湯唔換藥，短期內難望突然反彈，所以AC米蘭預計可以攞晒3分，足智彩開平手盤，紅黑兵團坐走望贏。（周日57，無綫網絡電視301頻道周一3:45am直播）

上場作客賽和森多利亞2:2之後，AC米蘭嘅傷兵並冇增加，蒙杜利禾、尼祖迪莊、蒙達利，阿歷士洛里高同埋阿比迪都會繼續倦勤，不過後防邦利拿就要停賽，其實情況唔算太壞，教練恩沙基一早有晒部署，照計唔會影響排陣。

本田圭佑喺國際賽期間表現唔錯，協助日本先後擊敗洪都拉斯同埋澳洲，而佢喺AC米蘭嘅作用一向都好大，夥拍已傷癒嘅艾沙拉維攻堅，仲有費蘭度托利斯同埋文尼斯作後盾，實在唔使擔心紅黑兵團嘅數糊能力，平手盤好穩陣呀！
國際米蘭新帥文仙尼再次領軍，不過始終係換湯唔換藥，球隊最近3場賽事皆無法取勝，分別賽和維羅納同埋不敵帕爾馬，另外喺歐霸賽和聖伊天，今次換帥最多只會帶嚟新鮮感，但對整體幫助真係唔算大，實在冇乜殺著可以攞3分。事實上，國米有不少主力會缺陣，包括中場甘柏拿路、馬維拿、古亞連、後衛迪岩布斯奧，同埋莊拿芬施些路，而中場加利美度就要停賽，文仙尼手上嘅籌碼絕對唔多，要率領球隊起死回生，相信要用多啲時間，唔可以奢求即時反彈。
由於今仗編定係AC米蘭主場，即使大家共用聖西路球場，A米球迷獲得嘅門票點計都會多啲，所以足智彩開平手盤，買紅黑兵團坐走望贏。