華倫西亞冠蓋「雲」集

華倫西亞冠蓋「雲」集
  
位處榜尾地帶嘅利雲特，近兩戰雖然稍見回勇，但整體實力仍偏離西甲正常水平，今晚喺打吡戰對住前列份子華倫西亞，睇怕都要慘受凌辱，足智彩開讓球盤，蝙蝠兵團讓半球、一球捧上盤。（周日40，now632台周一12:00am直播）

利雲特近兩仗先後以2:1擊敗艾美利亞，同埋1:1賽和西維爾，表現好似稍有起色，但實際上仍然千瘡百孔，特別係後防線，近5場怒失13球，平均一場波失超過兩球，買佢對家真係贏唔少，所以大家要珍惜喇，因為以利雲特嘅實力，應該係時候要跌落乙組，到時就冇咗恭盞神燈。
拉菲爾馬田斯同埋謝美加維蘭要養傷，利雲特嘅實力將會進一步削弱，即使係打吡戰關乎面子，相信呢支長期處於降班漩渦嘅球隊，都難以喺主場球迷面前逞強，平均實力輸蝕冇辦法。
華倫西亞近3戰獲2勝1和不敗佳績，球隊較早前獲新老闆注資大搞之後，全隊士氣果然立即提升，目前佔據前列位置已經反映出野心，而近期先後擊敗艾爾切同埋維拉利爾，兩仗都先後轟入對手3球，國際賽之前就同畢爾包握手言和。
德國國家隊後衛梅斯達菲近況好勇，近兩場入兩球，好在柏利祖、安祖高美斯、菲侯利同埋皮亞堤呢班攻擊球員亦不讓佢專美，近期頻頻取得士哥，而西班牙國家隊新寵兒柏高艾卡沙亦持續保持良好表現，入球量依然不減，是役以近乎夫添嘅陣容作客利雲特，有權喺打吡戰揚威，足智彩開讓球盤，華倫西亞讓半球、一球有計，上盤力足圖「利」