侯城受讓天官「刺」福

侯城受讓天官「刺」福
  
侯城陣中好多熱刺舊人，今晚集體倒戈實在夠晒睇頭，雖然侯城嘅近況唔算好，但係熱刺亦一樣咁差，英超賽事更經常甩轆，所以主隊今仗既獲受讓，可以捧侯城拔「刺」開「讓主」。（周日39，now621台周一12:00am直播）

其實侯城已經連續4場英超不勝，不過近3場只係失咗兩球，防守尚算穩陣，雖然阿歷斯布魯士倦勤，不過佢並唔係球隊嘅正選中堅，影響不大，另外辛迪加斯同謝拉域傷咗一段時間，領隊布魯士早有部署。
中場侯度史東同埋積基李華摩亞都會倒戈相向，呢兩位前熱刺球員，目前喺侯城嘅地位同作用舉足輕重，預料兩人會施展渾身解數，顯示實力俾球會睇睇，如果唔係戴臣受傷，侯城嘅倒戈軍團仲強大。另外，艾保靴南迪斯同埋恩歷克沙保喺前線已經愈嚟愈合拍，今仗再度雙鬼拍門，有機會幫主場嘅侯城攞晒勝利3分。
熱刺國際賽前又喺主場不敵史篤城1:2，目前喺聯賽榜已經跌出十大，即使門將洛里斯開口撐領隊普捷天奴，但係以熱刺高層過往換帥嘅作風，手起刀落亦唔係奇事。
幾位前鋒包括蘇爾達杜同埋艾迪巴約都冇貨交，球隊相信要倚重新星哈利卡尼，不過佢雙拳難敵四手，而且熱刺今仗有基爾洛頓停賽，基爾獲加又未痊癒，後防存在一定隱憂，所以足智彩開讓球主客和，捧受讓嘅侯城「讓主」係最佳選擇。