利物浦上盤「晶」明選擇

利物浦上盤「晶」明選擇

巴洛迪利受傷？咁就啱喇，呢位意大利國腳長期夢遊，利物浦冇咗佢反而仲勁，是役作客水晶宮出齊三大土炮攻堅，效果相信會更加好，足智彩開讓球盤，買紅軍讓半球、一球上盤最「晶」明。（周日26，now621台周日9:30pm直播）

水晶宮近況唔算太好，近5仗未嘗一勝，國際賽之前作客僅負曼聯0:1，表現已經算有交代，中場麥亞瑟據報已傷癒，奇雲杜里亦接近康復，但兩人未回復狀態，而恩歷克波拿斯嘅情況比較差啲，周中都仲未可以操足全課，肯定唔踢得！
事實上，水晶宮今屆主場成績都差強人意，只係試過擊敗李斯特城，另外對韋斯咸、車路士同埋新特蘭都輸晒，面對榜尾嘅般尼亦都贏唔到，完全冇主場威力可言，是役莫講話要爆冷，真係想保住不敗都幾難，受讓半球、一球唔着數。

巴神倦勤用列基林拔

利物浦有史杜列治同埋巴洛迪利受傷，咁就希望後者真係傷啦，因為巴洛迪利加盟後完全冇貢獻，擺佢喺度即係自斷一臂，領隊班頓羅渣士打算派列基林拔、拉爾拉拿同埋史達寧攜手攻堅，呢個英倫本土組合齊集速度、技術同鬥志，打地面波同高空波一樣得，效果隨時更理想。
除咗土炮進攻線，紅軍仲有謝拉特同埋佐敦軒達臣喺中場串連攻守，英倫味好重，加上球隊喺季初失分太多，即使爭標無望，亦唔想失去前四席位，12月都就到，係時候發力贏波搶分。
坦白講，利物浦已經累積咗3連敗，甚至有傳賓尼迪斯會重返晏菲路掌帥印，領隊羅渣士一定要醒醒定定，適逢下周中歐聯要作客盧多格德斯，紅軍絕對需要一場勝仗去壯行色，足智彩開讓球主客和，捧利物浦大鬧水晶宮開半球、一球上盤。