愛華頓讓和「斯」人醒 今晚英超其中一場實力最接近比賽係愛華頓對韋斯咸。愛華頓今季一直受傷兵同防線不穩問題困擾，而韋斯咸國際賽前出現回落跡象，計落愛華頓有主場之利可睇高一線，有力少勝開「讓和」。（周六28，now623台周六11:00pm直播） 愛華頓今季傷病不斷，史東斯、艾卡拉斯、白賴仁奧維度、巴利、派拿、米拉拿斯同干尼都唔打得，唯一好彩係前線仲有盧卡古、伊度奧同賴史密夫呢個鐵三角，要入波唔難；韋斯咸係今季奇兵，但安拿華倫西亞同迪亞法沙高呢個黃金組合據講都有傷，桑治更肯定缺陣，就算球隊已5場未輸過，造訪葛迪遜公園相信難逃小敗。