曼聯讓客「仙」見之明

曼聯讓客「仙」見之明
 
你以為曼聯俾FIFA病毒害得好慘咩？其實阿仙奴嘅傷兵情況一樣冇好過，佢哋今晚喺酋長球場遇紅魔，如果真係贏硬，主勝都唔會有接近2倍咁多，捧曼聯1.72倍「讓客」有「仙」見之明。（周六66，now621台周日1:30am直播）

阿仙奴新兵奧斯賓拿加盟後傷多過踢，所以門將一職都係由施捷斯尼負責，而哥斯尼同迪保治就仲未好番，領隊雲格其實得4個一隊嘅後衛可以用，換言之蒙利爾又要串演中堅，坦白講佢連左閘都未打得好，亦唔算頂得，隨時係計時炸彈。

普多斯基嗌走損士氣

中場方面，奧斯爾打咗柴，戴亞比同埋新人基拿比就「例牌」喺十字軍名單，而阿迪達同埋禾確特雖然先後傷癒，但都未重拾最佳水準，加上韋舒亞同埋普多斯基先後對領隊雲格有微言，前者話想墮後踢但不獲接納意見，而普多斯基就再一次埋怨冇上陣機會，公開話要明年1月出走，唔多唔少都會影響士氣，雖然阿歷士山齊士、阿歷士張伯倫同埋韋碧克呢期狀態唔錯，但係足球講整體，其他隊友問題多多一樣係負累。

迪基亞迪馬利亞可候命

講到士氣，其實曼聯呢期都算唔錯架，起碼一班球員已經逐漸適應領隊雲高爾戰術，上輪英超1:0力克水晶宮，防線終於喺相隔6場比賽後再次保持不失，儘管FIFA病毒搞到戴利白蘭特傷咗，不過門將迪基亞證實手指傷患無礙，迪馬利亞亦冇俾拿尼踢到太傷可以落場，勞基梳爾亦九成趕及披甲，所以曼聯人腳亦唔算太壞。
紅魔鬼兩位前鋒朗尼同埋尹佩斯腳風順，佢兩個喺國際賽檔期都有「士哥」，前者仲幫英格蘭上陣過百場，差3球就平到名宿波比查爾頓入球紀錄，信心方面唔使懷疑，足智彩開讓球主客和，捧曼聯作客酋長球場全身而退，「讓客」有「仙」見之明。