巴黎讓客「梅」開二度   法甲今晚有班霸聖日耳門提早出場；聖日耳門早前擊敗馬賽，喺聯賽追至僅落後1分，而佢哋今戰更加有大將伊巴謙莫域復出；相反梅斯近6戰1勝，睇怕呢場都好難係聖日耳門對手。（周五19，無綫網絡電視302頻道周六3:30am直播） 梅斯如果唔係早前有一段3連勝走勢，睇怕依家都好難企喺中游，事實佢哋近6戰僅1勝，至今13戰入13球，得球率只為下游水平，一面對強隊根本連反抗能力都缺乏。相對聖日耳門已6連勝，更加係喺伊巴缺陣期間取得，似乎球隊終於喺冇伊巴下都識踢波；而呢6連勝入面，卡雲尼更揹起入球重責個人轟入5球，要知道今場更有伊巴復出，似乎球隊火力更會進一步提升，而聖日耳門嚟緊歐聯僅對阿積士無需留力，有力贏兩球或以上開「讓客」。