捧賓福特上盤致「富」

捧賓福特上盤致「富」 
 
英冠夜演西倫敦打吡，綽號蜜蜂嘅賓福特喺格芬公園球場擺下擂台，靜待客軍富咸到訪，鑑於賓福特3連勝狀態可人，加上陣中傷兵唔多，是役少讓平手、半球吼實上盤可致「富」。（周五22，無綫網絡電視301頻道周六3:45am直播）

賓福特踏入11月之後大勇，喺英冠竟然連勝打比郡、諾定咸森林同埋米禾爾，而且每仗最少入兩球或以上，今個月佢哋仲有兩場主場賽事喺手，對手分別係今晚嘅富咸，同埋11月29日嘅狼隊，球員嘅目標當然係以全勝度過呢個11月啦！

安達格雷腳風超順

安達格雷係賓福特目前狀態最好嘅球員，近3仗合共攻入4球，上仗球隊能夠以3:2作客力克米禾爾，梅開二度嘅安達格雷功不可沒，而西班牙外援莊杜拉、愛爾蘭中場約拿芬杜格拉斯，仲有阿歷士柏列查特嘅腳風都好順，有權助主隊爭勝。
富咸上仗雖然以3:1擊敗哈特斯菲爾德，不過呢場只係佢哋近4戰以嚟首場勝仗，較早前富咸分別賽和黑池同埋韋根，另外喺聯賽盃大敗予打比郡出局，近4戰共累積失咗11球，後防好似豆腐咁散，門將比堤歷尼絕對要付上最大責任。

富咸後防嚴重不穩

其實富咸喺呢段低潮期當中，中前場球員都交足功課，例如洛達列加、維根基斯甸臣、羅斯麥哥馬克、柏加同埋拜仁雷斯呢啲耳熟能詳嘅球員，都頻頻交出「士哥」，只可惜後防嚴重不穩，以致前面入埋唔夠後面輸，難怪富咸喺英冠位列中下游。
呢場西倫敦打吡雖然只係英冠賽事，不過大戰氣氛就好濃，格芬公園球場所有門票已經售罄，當然大部份都係捧主隊賓福特啦，難得呢支倫敦蜜蜂兵團狀態又咁好，有權喺整個11月全勝，所以今仗少讓平手、半球唔怕追寶尾，上盤放心買。