日本讓主同「洲」共濟

日本讓主同「洲」共濟
 
日本剛剛取得大捷，氣勢如虹之餘，今次亦盡攬外流精英，是役友賽喺主場迎戰澳洲，相信可以食住個勢再添勝仗，畢竟袋鼠兵近況麻麻，要頂住東瀛軍團有難度，2.45倍「讓主」抵玩。（周二1，有線61及201台周二6:20pm直播）

上場熱身賽大勝洪都拉斯6:0，教練艾古爾總算喺上任後取得一場漂亮勝仗，令大家淡忘早前慘吞巴西4蛋嘅失利。獲重召嘅大阪飛腳老將遠藤保仁冇令艾古爾失望，上仗正選登場兼取得士哥，另外今次大軍仲包括香川真司、長谷部誠、吉田麻也、川島永嗣、岡崎慎司，同埋本田圭佑等外流精英，對戰亞洲球隊梗係超班啦。

洪都拉斯無懼中國

澳洲上月友賽卡塔爾輸0:1，富咸前鋒阿當泰加特、些路迪中場湯洛積、墨爾本勝利中場米利根，同埋紐卡素後衛高迪因傷冇歸隊，而西悉尼流浪者射手杜米祖歷同埋中堅史柏拉洛域同樣冇入選，陣容欠完整，今晚作客日本凶多吉少。
中國喺主場友賽洪都拉斯睇怕就冇乜機會贏波喇，事關FC山東同FC江蘇要踢足協盃關係，陣中嘅蒿俊閔、劉建業、孫可、任航，同埋王大雷都提早離開國家隊，返咗球會備戰，加上洪都拉斯剛大敗，是役一定謹慎，中國讓平手、半球好勉強，買洪都拉斯嘅1.96倍下盤，今次唔做愛國者。（周二2，香港時間周二7:35pm開賽）
伊朗主場對住南韓就和味濃，因為兩軍都召回唔少猛人坐鎮，伊朗有奧沙辛拿中場尼古納姆、奈梅亨前鋒查漢巴克殊，同埋魯賓卡山前鋒阿斯蒙，而南韓亦有利華古遜前鋒孫興民、史雲斯中場奇誠庸，同埋緬恩斯中場具滋哲，五五波搏和局。（周二3，香港時間周二8:55pm開賽）