阿根廷讓主實「牙」實齒

阿根廷讓主實「牙」實齒
 
夢劇場奧脫福今晚上演重量級友賽，由美斯率領阿根廷火併C朗領軍嘅葡萄牙，雖然後者重返成名地，變相有半個主場之利，可惜葡軍良莠不齊，要阻止阿根廷開「讓主」真係天方夜譚。（周二11，無綫網絡電視301頻道周三3:45am直播）

阿根廷大炒完香港之後，相隔一個月再友賽亦以2:1反勝克羅地亞，美斯更加取得「士哥」，足證呢位球王嘅狀態已經恢復，雖然教練馬天奴未必會俾一班主力踢足90分鐘，但係阿根廷人才濟濟，除咗美斯之外，仲有阿古路、馬斯真蘭奴、薩巴列達同埋安素佩雷斯等球星，大把籌碼喺手。

泰維斯要報答馬天奴

效力曼聯嘅迪馬利亞，今晚如無意外都會落場，佢對奧脫福就梗係熟悉啦，但唔好忘記獲重召嘅泰維斯都效力過曼聯，而且呢位射手再受到教練馬天尼青睞之後，似乎好想借助表現去證明實力，所以大家唔使擔心佢會Hea住踢，相信即使教練叫佢收油，泰維斯都會施展渾身解數。

C朗重返成名地奧脫福

今晚嘅焦點當然係C朗重返夢劇場啦，而且佢火併美斯亦肯定萬眾矚目，不過C朗已經開晒聲，話呢場只係普通友賽，叫大家唔好期望過高，預計佢都唔會踢足90分鐘架喇，更何況葡萄牙班波真係唔算高，上場歐國盃只能小勝阿美尼亞就可見一斑，逐個秤一定輸蝕俾阿根廷。
坦白講，呢隊葡萄牙經驗豐富，但就嫌活力不足，例如後防線再度重用卡維奴，另外重召保辛華，都令球隊嘅星味提升唔少，只係兩人年事已高，要守住美斯、阿古路、泰維斯同埋迪馬利亞呢班當打球星確實唔易，故此今仗唔值得睇好，足智彩開讓球主客和，預料C朗要喺國家隊層面輸俾死敵美斯，捧阿根廷「讓主」。