瑞典僅和黑山嘔兩分   瑞典袋咗落袋嘅3分要嘔番出嚟，因為佢哋喺歐國盃外圍賽G組作客被黑山迫和1:1，由3分變1分，可幸係傷癒復出嘅伊巴謙莫域有「士哥」，天王地位不變，而為黑山扳平嘅祖維迪亦打破個人入球荒，唔知曼城領隊柏歷堅尼睇唔睇到呢？ 早前因傷錯過咗巴黎聖日耳門多場賽事嘅伊巴謙莫域，已經缺席咗瑞典近兩場國際賽，今次佢復出助拳，只係用咗9分鐘就取得士哥，世界級球星果然唔係浪得虛名。 主場嘅黑山之後發起猛烈進攻，結果踢到尾段終於有收穫，由祖維迪射入12碼追成1:1完場，呢個入波對祖維迪嚟講都係及時雨，因為佢喺球會已經超過一個月食白果，曼城嘅戰績亦每況愈下，而家重拾射門鞋，希望返到英超可以為藍月亮出一分力啦。