西班牙三球輕取白俄   衛冕冠軍西班牙喺歐國盃C組外圍賽順利贏波，不過主場3:0擊敗白俄羅斯就唔算好多，因為佢哋受制於客軍嘅大巴戰術，所以半場已經領先兩球之下，換邊後只係入多一粒，但係以鬥牛兵團嘅殘陣嚟講，攞晒3分都可以收貨啦！ 值得一提嘅係，效力拿玻里嘅荷西卡利祖同埋祖雲達斯前鋒艾華路莫拉達分別幫西班牙處子登場，教練迪保斯基亦似乎好滿意佢哋嘅表現，並打算俾呢兩位球員喺對德國嘅友賽上陣。迪保斯基同時大讚打開紀錄嘅艾斯高，強調呢位皇家馬德里球員當選賽事MVP係實至名歸，但係就稍嫌艾斯高同其他西班牙球員一樣，太過追求完美，如果唔着重咁多細節，多啲直接嘅攻門，球隊今仗有權贏更多。目前西班牙取得4戰3勝，喺小組繼續落後全勝嘅斯洛伐克。