捷克冰島「和」氣收場   歐國盃A組形勢令人始料未及，出線大熱荷蘭3戰得3分，咁啱冰島同捷克3戰贏晒，荷蘭要打入頭兩名取下直接出線資格唔易；至於兩支全勝球隊今晚將正面交鋒，如佢哋有心將荷蘭踢出局，呢場打和就事在必行，和局有成3.45倍的確值得一博。（周日18，有線64及203台周一3:45am直播） 捷克本來俾人青黃不接嘅感覺，但3連勝攻入8個入波，似乎球隊已經逐漸重回高峰，不過佢哋今場對手冰島正值黃金一代爆發期，主力如史雲斯中場基菲爾施古臣等從U21年代已開始打出成績，一眾年輕球員升大國腳後帶領冰島取得突破已係意料之內，今場兩隊本來喺實力上都已經五五波，加上心態上都希望取1分為先，和局相當合理。