荷蘭讓和「脫」穎而出   荷蘭喺希汀克上任後近4戰輸3場，陣中主力效力拜仁嘅洛賓直言球隊冇汲取過去教訓，後防失誤毫無改善，而希汀克更豪言今場贏唔到拉脫維亞就辭職，睇嚟一眾荷蘭兵都會醒醒定定打番場身價波。不過荷蘭頹勢下唔見得有權讓到「-2」，呢場冷吼佢哋僅僅贏兩粒開「讓和」好過。（周日9，有線61及201台周一1:00am直播） 荷蘭出線形勢非常唔樂觀，因為同組兩支榜首球隊捷克及冰島已有9分喺手，咁啱荷蘭輸兩場波就輸晒俾呢兩隊，而且捷冰兩軍正好喺荷蘭打完呢場波後正面交鋒，如果賽和荷蘭就更難追上，但既然形勢已經被動，荷蘭呢3分更不容有失，但要注意拉脫維亞上場可賽和土耳其，有一定戰鬥力荷蘭又點贏得多。