比利時讓主揚「威」海外

比利時讓主揚「威」海外 
 
歐國盃B組上演大戰，紅魔鬼比利時喺主場面對威爾斯，無論實力、走勢，同埋往績都贏晒，即使客軍有大球星加里夫巴利坐鎮，相信亦惡唔出樣，足智彩開讓球主客和，捧比利時「讓主」。（周日7，有線64及203台周一1:00am直播）

比利時喺分組賽只係踢咗兩場，但亦有1勝1和佳績，日前熱身賽以3:1輕取近況唔錯嘅冰島，近4戰錄得3勝1和，不過車路士門將泰拔圖高圖爾斯仲好唔滿意隊友表現，可見呢班紅魔鬼球員對自己嘅要求相當高。事實上，比利時雖然冇咗受傷嘅曼城隊長高柏尼，但陣容方面仍然星光熠熠，愛華頓前鋒盧卡古、禾夫斯堡中場奇雲迪布尼、辛尼特中場韋素、曼聯中場贊奴沙、費蘭尼、熱刺中場迪比利、維頓漢、查迪尼，同埋車路士球星夏薩特全部入選，簡直好手如雲。

巴利仔雙拳難敵四手

威爾斯喺分組賽取得2勝1和暫列榜首，不過上仗以2:1擊敗塞浦路斯就付出咗代價，事關李斯特城中場安治京治累積夠黃牌要停賽，另外，效力查爾頓嘅前鋒卓治、些路迪中場阿當馬菲斯，同埋諾定咸森林中場禾漢分別因唔同理由而冇被徵召，預料中前場3大球星包括阿仙奴艾朗藍斯、利物浦祖阿倫，同埋皇家馬德里嘅加里夫巴利會踢得比較辛苦，畢竟威爾斯球員平均質素有限，就算加里夫巴利等人識飛都只係雙拳難敵四手。

比利時未嘗不敵威爾斯

喺比利時足球史上，佢哋從未試過主場不敵威爾斯，而教練韋莫斯嘅球員同執教生涯亦冇輸過俾威爾斯，合共錄得3勝1和佳績，所以呢支歐洲紅魔鬼無論喺實力、走勢，同埋往績方面都贏晒，3分絕對係袋袋平安，足智彩開出讓球主客和，比利時1.68倍大熱「讓主」勢必揚「威」！