三獅讓主與眾同「諾」

三獅讓主與眾同「諾」
 
朗尼第100場國際賽喎，俾吓面啦！今晚英格蘭喺溫布萊迎戰斯洛文尼亞，除咗係歐國盃E組戲碼之外，亦係朗尼百場紀念碑慶典，波比查爾頓都會出席，三獅勢開「讓主」做賀禮大團圓。（周六37，有線61及201台周日1:00am直播）

英格蘭領隊鶴臣今次點兵算係有啲驚喜，因為修威頓右閘尼達利基尼同埋西布朗前鋒比拉希奴都有份入選，另外達寧亦獲得重召，鶴臣終於有一次係憑狀態揀人，唔再着重名氣，不過由曼聯轉投阿士東維拉後場場正選嘅湯卡華利就名落孫山，究竟點解以前長居後備都揀，依家擔正就唔揀呢？咁就真係要問下鶴臣喇，但係冇咗啲冗員，硬橋硬馬有料就入選，始終係好事。

英格蘭分組賽三戰全勝

三獅兵團霸氣就冇架喇，不過佢哋勝在平穩，喺歐國盃E組3戰全勝，包括2:0贏瑞士、5:0贏聖馬力諾，同埋1:0贏愛沙尼亞，當中表現得最好嘅球員首推韋碧克，鑑於呢位黑先鋒過去效力曼聯時，已經同朗尼有晒默契，攜手再為英格蘭攻堅自然如魚得水，小組4連勝絕對唔係問題。
斯洛文尼亞目前係E組都排第2位，佢哋早前先後擊敗瑞士同埋立陶宛，但就有作客不敵愛沙尼亞嘅紀錄，睇嚟斯洛文尼亞作客表現要打個7折。該隊今仗有重傷18個月後復出嘅安迪積高域歸隊，另外沙馬迪錫亦係傷癒後再次入選，以消息嚟講當然係好事，不過兩人嘅狀態就明顯未回復應有水平，是役未必幫到球隊頂住英軍。

卜比Sir為朗尼頒紀念喼帽

雖然三獅軍團過往唔多大炒對手，但今晚始終係朗尼第100次為國家隊披甲，足總為隆重其事，仲搵咗卜比查爾頓嚟頒贈紀念喼帽，咁值得高興嘅日子，預料英格蘭會慷慨開「讓主」娛賓。