撐墨西哥排除萬「蘭」

撐墨西哥排除萬「蘭」 
 
荷蘭同墨西哥今晚會繼世界盃16強後再次碰頭。荷蘭世盃後改由希汀克接手，加上一班老將冇晒火氣導致成績急速下滑，相反墨西哥今場仲有卡路士韋拿事隔多年復出，捧客勝分分鐘有意外收穫。（周三4，足智彩周四3:30am網上文字直播）

荷蘭喺世界盃攞到季軍，但球隊早就表明大賽過後雲高爾會離隊，由希汀克接手，只係呢位名帥重新接掌帥印後，荷蘭表現保持唔到之餘仲跌到好勁，至今踢4場波得1勝3負，只贏過哈薩克而歐國盃外圍賽已先後輸咗俾捷克以及冰島，以荷蘭角度睇當然唔多合格。
事實上，荷蘭喺世盃前已俾人話青黃不接，好彩球隊有啲籤運、雲高爾調動又得宜，再加上洛賓勇不可擋先至攞到個季軍；但大賽過後洛賓狀態未復，尹佩斯更係操極唔起，再加埋所謂新星如迪比、佐迪卡斯以及迪維積等其實並唔係乜嘢一線球員材料，難怪橙衣兵團會搞到今日今日咁嘅田地，喺表現未見有改善前都不宜追捧。
相比荷蘭，墨西哥世界盃後表現唔差，雖然全部係友賽，但近3戰連贏玻利維亞、洪都拉斯以及巴拿馬，途中更一球不失，攻守演出穩定。事實上，墨西哥喺早前奧運攞到金牌，足證陣中年輕球員潛力十足，經過世盃洗禮下相信會更上一層樓。

墨西哥前中後齊腳

再者，墨西哥今次選人仲有意外驚喜，皇蘇前鋒卡路士韋拿終宣告出山，由佢配合番皇馬射手射手查維亞靴南迪斯、維拉利爾前鋒杜斯山度士、中場莊拿芬杜斯山度士、馬體會前鋒魯爾占美利斯同馬拉加門將奧祖亞，踢落肯定不落下風，客勝值博。