阿根廷捧大有見「地」

阿根廷捧大有見「地」
 
英國倫敦今晚會上演一場技術型大戰，由阿根廷同克羅地亞切磋較量，鑑於兩隊嘅攻擊球員都係有姿勢有實際嗰隻，加上彼此都啱啱取得大捷，是役碰頭入波肯定唔會少，買入球大係最佳嘅選擇。（周三5，香港時間周四3:45am開賽）

阿根廷上個月先至喺政府大球場怒炒香港隊7:0，今仗唔單止保留番大部份原班人馬，仲重召埋泰維斯，須知道野獸呢期喺祖雲達斯腳風超順，上周對帕爾馬又梅開二度，阿根廷前鋒線多埋佢幫手，攻力肯定有增無減。球王美斯繼續入選大軍，名單仲有曼城前鋒阿古路、拿玻里射手希古恩、曼聯中場迪馬利亞、巴黎聖日耳門嘅柏斯托尼、巴塞隆拿馬斯真蘭奴、曼城後衛薩巴列達同埋中堅迪米捷利斯，友賽都好認真喎！

克羅地亞火力全開

克羅地亞都唔簡單，上月喺歐國盃外圍賽大勝阿塞拜疆6:0，馬德里體育會中鋒文迪蘇傑、禾夫斯堡前鋒奧歷、皇家馬德里中場莫迪歷、巴塞隆拿中場拿傑迪錫、莫斯科火車頭後衛哥魯卡，仲有薩克達後衛達里祖史拉全部入選，又係火力盡出，今晚對阿根廷想唔開入球大都幾難。