巴西讓客「耳」成定局

巴西讓客「耳」成定局
 
自從鄧加回歸之後，巴西嘅4場熱身賽錄得全勝佳績，雖然今晚作客伊斯坦堡會以試陣為主，仲帶埋唔少新仔出巡，但由於主隊土耳其人腳亦唔齊，預料森巴兵團可以輕鬆開「讓客」。（周三2，無綫網絡電視301頻道周四2:30am直播）

土耳其唔止人腳唔齊整，佢哋嘅近況亦相當差，近3場歐洲國家盃外圍賽竟然錄得1和2負劣績，包括0:3慘敗予冰島、1:2輸俾捷克，同埋1:1賽和弱旅拉脫維亞，嚟緊外圍賽喺主場對哈薩克，絕對需要贏波攞3分，否則出線機會就愈嚟愈渺茫，變相今仗友賽巴西未必搏命去到盡，宜備忘。

土耳其多名球星缺陣

聖伊天前鋒艾丁、比錫達斯射手比克迪米克同埋費倫巴治門將迪美爾，都再次獲教練泰林徵召，加拉塔沙雷前鋒布拉卡爾馬斯、馬德里體育會翼鋒阿達杜蘭、費倫巴治中場美密特托普，仲有史浩克04後衛卡恩阿耶漢亦有入選，不過部份大名氣球員就因傷缺陣，包括多蒙特中場紐尼沙軒、史特加中場沙拉亞、利華古遜中場卡漢奧奴，同埋後衛奧馬托柏克，而國家隊隊長安利同樣因傷避戰，土耳其根本無法出夫添迎敵。

巴西有歐聯神射手壓陣

巴西喺教練鄧加回巢任教後4戰全勝，睇怕都唔會俾土耳其終止強勢，所以鄧加亦唔介意帶埋啲新人試陣，包括賀芬咸嘅羅拔圖法明奴，仲有薩克達前鋒路爾斯阿祖安奴，不過後者目前係歐聯神射手，由佢夥拍尼馬組成前鋒線，威力隨時仲勁。
唔使擔心有新仔掛帥嘅巴西會揸流攤，因為韋利安、奧斯卡杜斯山度士、大衛雷斯同埋堤亞高施華等主力全部都有份歸隊，森巴兵團嘅陣容依然好強大，所以足智彩開讓球主客和，可以放心捧巴西反轉伊斯坦堡，開埋「讓客」一啲都唔出「其」。