“文哥”威過“雲戈”

“文哥”威過“雲戈”

曼聯上季徹底失敗，唔使講“孭鑊”之人當然係莫耶斯，結果豉椒炒魷，仲要拎埋隻鑊走。

為咗挽回聲譽重振“魔”聲，曼聯重金禮聘雲戈爾做“魔”頭，可惜球隊仍未起死回生，戰績依然起落不定。咁又係，一時三刻要執莫耶斯個爛攤子並不容易，即管畀啲時間“雲戈”。

講開雲戈爾，就不得不提佢嘅同鄉兼亦徒亦友嘅“老死”朗奴高文。因為“文哥”今季同樣空降英超，不過就比師父雲戈爾風光得多。“文哥”今季執教英超小球會嘅修咸頓，到目前為止都算超級神奇，英超踢咗十一輪比賽，修咸頓取得八勝兩和一負攞到廿五分，守住聯賽榜第二位，仲咬住“一哥”車路士唔放，如此佳績簡直令人驚喜。

修咸頓咁勁到底有乜料？睇一睇球員名單，真係搵唔到一個熟悉球星，甚至連個名都比較陌生。球員身價更加唔使講，比起曼聯粒粒巨星，件件過萬鎊周薪嘅“魔星”，修咸頓簡直蚊同牛比。所以話，“文哥”係咪叻過雲戈爾好多呢？