祖記讓主「馬」到功成

祖記讓主「馬」到功成
 
意甲一哥祖雲達斯喺過去周中歐聯雖然僅勝奧林比亞高斯，但其實對士氣有好大幫助，加上球隊今周留守主場出擊，體力亦唔成問題，面對執筆時排尾2嘅帕爾馬可輕鬆開「讓主」。（周日36，無綫網絡電視301頻道周日10:00pm直播）

祖記喺過去周中歐聯3:2險勝奧林比亞高斯，冇錯贏得係比預期辛苦，但大家都知經歷一場苦戰最後可以贏到對手，球員士氣肯定有所提升；再講，祖記周中場波喺主場打，今晚留守都靈單係體力已唔使擔心，更添贏波籌碼。
事實上，祖雲達斯喺意甲真係大超班，今季頭10場波8勝1和1負，主場更係坐擁近10戰9勝1和佳績，有利因素真係好多；再講，「老婦人」今晚都係得柏比、巴沙利、馬田卡沙利斯同艾拉等長期傷將缺陣，而保羅普巴、派路、泰維斯以及洛蘭迪等就個個冇傷冇病可以繼續候命，人腳依然完整，難怪初盤「讓主」會熱到咁透啦。

帕爾馬陣內傷兵滿營

至於帕爾馬今季真係抬唔起頭做人，球隊排喺第19位，即聯賽尾2位置，至今踢10場得2和8負，失21球更係全意甲最差賽績，面對班霸級別嘅祖記自然難踢。再講帕爾馬一眾傷兵情況依然冇起色，比亞比安尼、普斯、柏拿甸奴、馬森姆高達、基斯度布佐基拉、比達奧爾、加路柏、卡辛尼同柏列達都唔打得，門神哥達斯就繼續坐波監，得個卡斯辛奴點頂得住全隊祖記呀！