熱刺上盤「篤」定收錢

熱刺上盤「篤」定收錢
 
如果要數英超近排其中一支近況最好球隊，相信熱刺都肯定唔可以唔提，佢哋近3場正式比賽全勝，今晚仲有主場之利，對住近期只攻唔守嘅史篤城肯定佔盡上風，讓半一盤抵玩。（周日26，now621台周日9:30pm直播）

熱刺今季季初經歷過一段低潮期，好在領隊普捷天奴始終係有料之人，執執吓近排熱刺表現又似番啲樣，英聯盃贏白禮頓晉級、聯賽最後反勝阿士東維拉，再來過去周中歐霸作客2:1贏卓普利斯，3連勝賽績足以證明球隊已成功反底。

人腳方面，熱刺依然有基爾獲加、艾朗連儂兩位長期傷兵肯定唔打得，但安祖斯唐辛同哈利卡尼兩位英格蘭新星卻愈戰愈勇，而兩名翼鋒查迪尼同拉美拿近況亦Fit，上述4人已包辨晒球隊近3場勝仗所有「士哥」，對方守將今晚有排震。

史篤城變革冇成果

客軍史篤城過往俾人感覺係打士氣波，球員全力防守配合高Q大棍英式踢法同各大英超勁旅周旋，只係球隊上季由曉士接手，竟諗住改變踢法玩地面進攻，收購球員如保贊、阿拿奧杜域都係為配合戰術而來。冇錯曉士今次革新為令球隊上季成功護級，但問題卻喺蜜月期過後開始湧現，睇史篤城近3戰兩對修咸頓同主場鬥韋斯咸，加埋竟然失咗6球入4球，證明掛住進攻就唔記得搞防守，依家球隊仲有賀夫、格連韋倫等中後場主力倦勤，造訪白鹿徑睇怕九死一生。