愛華頓維「新」開上盤

愛華頓維「新」開上盤
 
英超星期日有多場比賽，其中新特蘭上輪雖作客贏水晶宮，但由於之前表現太差，未證明已反底下，級數本身就較高嘅愛華頓可睇高一線，讓球盤讓平、半開上盤冇「蘭」度。（周日25，now622台周日9:30pm直播）

愛華頓季初大脫腳，但球隊本身班底根本唔差，所以企穩陣腳後近戰賽績已全面冒升，聯賽近3周攞7分，包括連贏維拉同般尼，以及賽和史雲斯，加埋過去周中歐霸主場3:0大炒里爾，絕對有理由相信上季嗰隊「拖肥糖」已經返咗嚟。

陣容方面，愛華頓依家得番一班長期傷兵唔打得，即史東斯、米拉拿斯以及干尼等人，但上述球員喺拖肥糖近期比賽根本冇份作貢獻，相反伊度奧、盧卡古、賴史密夫、巴克里、巴尼斯等等球員就冇傷冇病可以候命，當有力延續佳績。

新特蘭攻守皆欠銳

主隊新特蘭上周作客以3:1大勝水晶宮，但費格然睇過呢隊波好多次，佢哋防守有幾大炸彈布朗同奧沙落場自然唔穩陣；而進攻更係領隊普耶一直解決唔到嘅難題，要知道「黑貓」本身就冇乜創造力球員，施巴斯坦拿臣、魯迪維爾都係工兵格，最慘係前場史提芬費查、域咸同艾迪杜里個個都係大而無當，空有體形優勢但冇自己搵食能力，把握力亦唔見特別，配合埋球隊仍有比利鍾斯、基亞卓尼利同雲安荷特等主將受傷，要繼對水晶宮後再偷多次雞難度甚高。