阿仙奴上盤風起「雲」湧

阿仙奴上盤風起「雲」湧
 
阿仙奴今晚會由倫敦殺上威爾斯，同史雲斯喺英超作正面較量，雖然兵工廠傷兵唔少，但係阿歷斯山齊士近況大勇，禾確特亦已經復出，加上往績唔輸蝕，少讓平手、半球梗係揀上盤啦！（周日42，now621台周一12:00am直播）

史雲斯近況唔好，近6場只係贏得1場，聯賽盃又俾利物浦淘汰，上周就同愛華頓悶和0:0，季初一度排榜首嘅虛火已經熄晒，雖然韋菲特邦尼、魯迪治同埋基菲爾施古臣呢班攻擊球員喺呢段時間都有貨交，但仍然幫唔到球會起死回生。

法比安斯基倒戈難踢

領隊蒙克當然想喺主場擒下阿仙奴重回正軌啦，問題係傷兵情況冇改善過，迪安達里同埋羅利唐納利依舊復出無期，中場主力舒維爾又需要繼續停賽，想變陣都有難度，今晚唯有寄望倒戈嘅法比安斯基打爭氣波，盡量將失球數字減低。
其實阿仙奴本身嘅傷兵都唔少，阿迪達、哥斯尼、戴亞比、迪保治、奧斯爾同埋奧斯賓拿都唔出得，不過法國射手基奧特就有喜訊傳出，因為軍醫證實佢嘅康復進度良好，今個月底應該就可以亮相，而且久違了嘅禾確特亦喺上場比賽復出咗，領隊雲格喺排陣方面都唔需要太頭痕。

山齊士大勇三戰入五球

阿歷斯山齊士近3場比賽累積射入5球，證明狀態好之餘，亦證實球隊冇入錯貨，配合阿歷士張伯倫、韋碧克同埋辛迪卡索拉等好波之人，大家唔使擔心兵工廠今晚會唔夠火力攻陷史雲斯城池。
睇番往績，阿仙奴出訪威爾斯對史雲斯嘅成績表並唔失禮，淨係2013年都交手3次，當中錄得2勝1和不敗佳績，上屆英超就作客贏2:1，當時嘅盤路同今晚一樣，兵工廠都係少讓平手、半球，預期呢個歷史將會再度重演，上盤風起「雲」湧。