紅軍讓主有「路」可尋

紅軍讓主有「路」可尋
 
長路有盡時，雖然車路士坐擁不敗金身，但係紀錄始終會破，而今仗對手利物浦不惜喺歐聯留力，背負千夫所指就係為咗呢場英超大戰，單係嗰份決心已經夠晒睇頭，紅軍「讓主」值得買。（周六8，now621台周六8:45pm直播）

利物浦周中作客用B隊鬥皇馬，結果輸0:1，賽果雖然唔核突，但係領隊羅渣士冇尊重呢場歐聯嘅排陣，就引嚟球壇名宿批評，最新消息係連歐洲足協主席柏天尼都加把口，促請羅渣士交代，搞到滿城風雨，都係想留力今晚對車路士啫，畢竟上仗要作客班拿貝，贏面始終唔夠英超留守晏菲路咁大，背負千夫所指冇理由放過車仔。

史杜列治無緣倒戈

射手史杜列治仲未傷癒，倒戈唔使預佢，但係對銀河艦隊時先列後備嘅謝拉特、佐敦軒達臣、格連莊臣、洛夫雲同埋巴洛迪利等主將，肯定會喺今晚悉數披甲，而且紅軍有唔少傷兵已相繼復出，陣容逐漸完整下，有望喺主場創造佳績。

車仔休息時間少一日

車路士周中歐聯都失分，佢哋作客斯洛文尼亞對馬里博爾只能踢成1:1平手，計休息時間比利物浦少一日，而且連續兩場作客，唔多唔少都會有影響。中鋒迪亞高哥斯達復出後明顯就住踢，表現冇之前咁勇猛，而夏薩特就喺歐聯射失12碼，隨時出現信心危機，雖然法比加斯、奧斯卡杜斯山度士同埋尼曼查馬迪等星級球員都好有料，不過紅軍有備而戰，車仔真係唔易攞3分。
事實上，車路士賽和馬里博爾之後，已經平咗隊史嘅最長開季不敗紀錄，正所謂長路有盡時，大家好難期望佢哋一整季都唔輸，加上車仔今屆作客啲傳統列強唔算得心應手，先後到訪曼城同埋曼聯都和波，是役喺晏菲路要讓波靠唔住，捧紅軍「讓主」。