阿聯上盤乘風破「浪」

阿聯上盤乘風破「浪」

澳職今日打兩場波，其中較後時間開波阿德萊德聯會主場對FC悉尼。「阿聯」今季表現可人，加上雙方早前曾碰頭當時阿聯作客都保到不敗，今次主客互調少讓平手、半球合理，捧上盤穩陣。（周五2，有線64及203台周五4:45pm直播）

事實捧阿德萊德聯真係合情合理喎，佢哋今季到依家踢咗7場正式比賽冇輸過，仲僅和咗兩場，當中包括澳足盃作客迫和FC悉尼1:1，最後加時贏埋晉級，心態上已唔驚對手；而講到近況，阿聯之後踢兩場聯賽贏晒，分別以2:0贏珀斯光輝同作客2:1搞掂墨爾本城，士氣亦唔使懷疑。至於陣容方面，主隊有佐敦艾斯、甘馬倫屈臣、禾蘭特同法比奧費拉拿或因傷缺陣，但除咗後者根本全部係舊傷，影響未算大，最重要係幾名腳風順球員沙治奧施里奧、迪捷特都可以候命，配合地利讓球盤少讓平半好合理。
客軍FC悉尼今季其實都未嘗一敗，但之前講過佢哋主場贏唔到阿聯，被睇低一線都啱數，再睇埋往績，FC悉尼唔經唔覺原來已經連續四次對阿聯贏唔到波，賽績係2和2負，格食格味道好濃，就算球隊近兩周連贏布里斯班獅吼同中岸水手，都係俾唔到人信心。講埋陣容，FC悉尼有賴恩格蘭、祖文同保斯基缺陣，要注意後者係悉尼今季進攻核心，冇咗佢前面哥利加美路要爭取「士哥」肯定難得多，難對阿聯構成威脅。

流浪者腳軟難敵鳳凰

頭場威靈頓鳳凰對西悉尼流浪者形勢就較簡單。流浪者贏咗亞冠仲未慶祝完，今鋪咁遠飛去新西蘭比賽肯定腳軟，鳳凰讓平半信得過。（周五1，有線64及203台周五2:30pm直播）