薩克達無「迪」捧讓主

薩克達無「迪」捧讓主
 
當世人都以為薩克達因烏克蘭局勢不穩而受到影響時，呢支國內班霸卻以行動摑球迷一巴掌，球隊上輪作客7:0大數今晚對手巴迪之後，依家已殺上次席，今場主客互調自然亦係捧「讓主」較佳。（周三8，香港時間周四3:45am開賽）

早排烏克蘭局勢緊張，一度有傳薩克達一眾外援都唔夠膽歸隊，球隊眾成員亦無心戀戰；而冇錯睇賽績薩克達亦好似冇以往數季咁有霸氣，當中國內聯賽大戰基輔戴拿模都輸波而回，只係一出歐聯佢哋又似乎有番啲心機，先後和咗波圖、畢爾包，上輪更作客7:0大勝巴迪，證明級數遠喺對手之上。最後陣容方面，薩克達冇乜傷病問題，更可以用上上場原陣出擊，就算只發揮一半水平都夠開「讓主」。
客軍巴迪喺白俄羅斯無敵手，過去一輪聯賽贏埋明斯克戴拿模，聯賽累積28場不敗；可惜咁又點，巴迪出到歐聯級數就同人差一截，踢3場1勝2負，係贏過今季唔掂嘅畢爾包，加埋陣白俄羅斯國腳兼球隊後防核心菲列比高唔可以候命，防線冇咁穩陣下再大敗機會好高。