多蒙特讓主「加」注捧   歐聯D組除咗阿仙奴，榜首多蒙特自然亦要留意，佢哋今屆分組賽表現醒神，過去周末對拜仁亦有極佳演出，面對魚腩加拉塔沙雷「讓主」應可穩開。（周二8，有線63台周三3:45am直播） 多蒙特今季聯賽跌到落降班區域，相反歐聯D組就3戰3勝冇失波排喺榜首，認真諷刺；講真，威威上周末睇佢哋作客拜仁，其實唔明點解聯賽成績會差成咁，嗰場佢哋單係香川仔、馬高列奧斯同埋奧巴美揚已經搞到拜仁防線亂過亂世佳人，今場就算改用恩莫比利攻堅，入波依然都有把握。 客軍加拉塔沙雷名氣就有，但可能受財困拖糧影響，就算坐擁史奈達、彭迪夫等星級人馬，分組賽表現依舊豪無起色，至今僅得1分但加埋失咗9球之多，後防唔掂而今晚又有攻擊主力艾甸耶馬斯因受傷而倦勤，作客德國都難逃大炒。