阿仙奴「列」陣開讓主   歐聯D組今晚兩場波都幾易買，其中阿仙奴上輪作客咁都反勝安德列治，今晚返主場兼傷兵問題逐步解決，要輕鬆贏兩球或以上開「讓主」冇難度。（周二7，有線64及203台周三3:45am直播） 阿仙奴上輪尾段入兩粒反勝安德列治，證明只要一比心機要攻入對手簡直易如反掌，最緊要係球隊傷停問題已冇咁嚴重，門神施薩斯尼坐完波監可復出把關，另前線韋碧克、阿歷斯山齊士、艾朗藍斯以及辛迪卡索拉全數可以候命，火力咁強再加埋酋長球場主場之利，「讓主」穩陣。 安德列治上輪主場咁都臨尾香，今晚要偷雞就更難；要注意球隊3輪失咗6球，雖然唔係同組最差，但明顯都唔係叻，加埋陣容上中場核心迪科亞，後防主將尼沙卡拉全數因傷唔可以落場，成條中後場隨時散晒，俾兵工廠借勢大勝一場。