皇馬讓兩球有「利」可圖

皇馬讓兩球有「利」可圖
 
讓兩球咁少？利物浦上次歐聯主場對皇家馬德里都輸3蛋，簡直廢到核爆，今晚作客班拿貝球場可謂凶多吉少，銀河艦隊讓兩球有高水回報，大家仲諗咩呢？唔買「讓主」真係離晒譜啦！（周二5，有線61及201台周三3:45am直播）

簡單計下一條加數先，皇馬自從9月17號開始，已經喺各項盃賽累積取得11連勝，難怪門將卡斯拿斯都話，依家呢隊銀河艦隊，可能係佢效力球會以嚟最強大嘅一季。卡斯拿斯又講得冇錯呀，皇家喺呢個11連勝走勢當中，有超過三份二都係贏波贏盤，炒3、4、5球真係最低消費，8:2怒宰拉科魯尼亞已經係舊聞，早前國家打吡輕取巴塞隆拿3:1，仲有上周西甲以4:0大勝CF格蘭納達先係最新戰績，強勢停不了。

皇馬前線腳風奇順

加利夫巴利同埋法比奧干查奧繼續養傷，不過右閘丹尼爾卡華積有機會復出，鑑於C朗腳風同狀態超順，同近期表現大有進步嘅占士洛迪古斯合拍攻堅絕對威力無窮，後者上周西甲先至梅開二度，咪忘記法國射手賓施馬亦頻頻有「士哥」，今晚銀河艦隊又上演一幕大屠殺唔出奇。
利物浦呢期嘅戰績簡直係垃圾，上次歐聯分組賽輸俾皇馬之後，再喺英超分別和侯城同埋輸俾紐卡素，只係喺聯賽盃驚險淘汰史雲斯。紅軍後防唔穩陣，洛夫雲、米洛列特同埋艾拔圖摩蘭奴都排住隊孭鑊，再加上前鋒線唔夠力，史杜列治仍未傷癒，巴洛迪利又碌碌無能，所以謝拉特同埋史達寧兩個土炮幾落力都無作為。

紅軍攻不銳守不穩

皇馬中場莫迪歷上次喺晏菲路贏波後表示，3:0絕對係炒得少，最大原因係當時球隊心繫國家打吡，咁我哋不妨研究下賽程，銀河艦隊下一場賽事就係本周主場對華歷簡奴，換句話講易過食菜，根本冇勒住踢嘅必要，可以盡情狂數利物浦啦！足智彩開「-2」有高水回報，「讓主」值得捧場！